Ancelottti ampiga kijembe Tata Martino siku 4 kabla ya game ya El Clasico

Meneja wa klabu ya Real Madrid Carlo Ancelotti, amesema tayari anafahamu kikosi chake cha kwanza ambacho kitaanza katika mchezo wa ligi ya nchini Hispania mwishoni mwa juma hili dhidi ya FC Barcelona katika uwanja wa nyumbani wa Stantiago Bernabeu.

Carlo Ancelotti, ametoa uhakika wa kufahamu kwa undani kikosi chake kitakacho ikabili FC Barcelona katika mchezo wa El Clasico, ikiwa ni siku mbili tu zimepita baada ya mpinzani wake Gerardo Martino kushindwa kuweka wazi ni kikosi kipi kitakachoanza katika mchezo huo.

Amesema litakua jambo la kijinga kwake kushindwa kutambua ni mchezaji gani atakae mtumia katika mchezo huo, ili hali kila mwishoni mwa juma amekua akipanga vyema kikosi chake na kupata matokeo mazuri.

Katika hatua nyingine meneja huyo kutoka nchini Italia, ameongeza kwamba ushindi wa jumla wa mabao tisa kwa mawili dhidi ya Shalke 04 walioupaya kwenye michuano ya ligi ya mabingwa barani Ulaya, umeendelea kuwapa msisimko wachezaji wake kuelekea katika mchezo dhidi ya Barcelona.

Amesema kwa hakika lengo lililopo katika mchezo huo ni kusaka point tatu muhimu na ana hakika wachezaji wake watalitimiza suala hilo, bila shaka yoyote kutokana na kutambua ushindani uliopo katika msimamo wa ligi ya nchini Hispania.

Endapo Real Madrid wataibuka na ushindi katika mchezo huo wataendelea kujikita kileleni mwa msimamo wa ligi ya La Liga kwa kufikisha point 73, ambazo zitaleta utofauti wa point saba dhidi ya Barcelona ambao pia wanataka kupunguza pengo la point nne lililopo hivi sasa dhidi ya mahasimu wao.